Түңгәүер ырыуы вәкилдәренең V съезы уҙғарылды
30 июнь айында Баймаҡ ерлегендә Башҡортостан республикаһының төрлө төбәктәрендә йәшәүсе Түңгәүер ырыуы вәкилдәренең V съезы уҙғарылды. Был сарала Әбйәлил, Баймаҡ, Бөрйән, Белорет, Йылайыр, Хәйбулла райондарынан һәм Сибай, Өфө ҡалаһынан, Күгәрсен районының Дүңгәүер ауылынан дүңгәүер ырыуы делегаттары ҡатнашты. Мәртәбәле ҡунаҡтарҙы Баймаҡ районы башлығы – Фәнис Ғәбдрәшит улы Әминев сәләмләне. Артабан ҡорҙо Түңгәүер ырыуы башлығы, Рәсәй Федерацияһының һәм Башҡортостан Республикаһының халыҡ артисы, С. Юлаев исемендәге дәүләт премияһы лауреаты, “Дуҫлыҡ ордены” кавалеры, Бөтә донъя башҡорттарының Президиумы ағзаһы – Хөрмәтулла Ғаззали улы Үтәшев етәкләне. Йыйын бай йөкмәткеле сығыштарҙан, бәхәсле аралашыуҙарҙан, ҡыҙыҡлы тарихи ваҡиғалар хаҡында әңгәмәләрҙән ғибәрәт булды. Көнүҙәк мәсьәләләр, Түңгәүер ырыуы вәкилдәрен борсоған һорауҙар ҡаралды, йыйындың резолюция проекты ҡабул ителде. Сараның аҙағында Түңгәүер ырыуы эшендә һәм Йыйынды үткәреүҙә әүҙем ҡатнашыусылар бүләкләнде.